Gott dæmi um illan hug Loka er þegar hann plataði Höð til að skjóta mistilteini í gegnum Baldur þar sem hann stóð undir "meinlausri" skothríð hinna ásanna. Fyrir það var honum refsað illilega og er hann nú hlekkjaður niðri í helli. Það hangir eiturslanga yfir honum og eitrið úr henni drýpur niður á andlitið á honum. En konan hans, hún Sigyn, situr hjá honum og lætur eitrið drjúpa í skál. Þegar hún fer að losa skálina drýpur eitrið í andlit Loka og kippist hann þá svo hart við að jörð skelfur öll. Það köllum við jarðskjálfta.
Það má segja að Loki hafi búið til allt það versta sem í heiminum er, því hann átti Hel, Fenrisúlf og Miðgarðsorm með skessunni Angurboðu, en þau áttu eftir að verða stór hluti hins illa í heimsendi.