Hér á eftir er bent á ýmis atriði sem máli kunna að skipta.  Ætlast er til að hver nemandi svari þessum spurningum jafnóðum og hann/hún les bókina.  Bent skal á að þægilegt getur verið að vinna svörin með félaga þótt hver skrifi sína útgáfu af svörunum.
 

1. kafli: Athugaðu lýsinguna á veislu drottningar og umhverfi í þeirri veislu.  Er hægt að sjá viðhorf höfundar til veislunnar?  Má finna einhverja svipaða lýsingu fyrr í sögunni?  Um hvaða „drottningu Íslands“ talar Arnas í þessum kafla?

2. kafli:  Skoðaðu meðferð mismunandi dómsstiga á máli Magnúsar í Bræðratungu.  Er einhver sérstök ástæða fyrir því að Arnas er dæmdur sekur í hæstarétti (sem er í Danmörku)?  Hvaða ályktun má draga um réttarfar af þessari málsmeðferð (hafðu einnig í huga mál Jóns Hreggviðssonar)?

Er hugsanlegt að bókin Skálda sé tákn?  (Hafðu í huga:  Jón Marteinsson stelur Skáldu, Magnús í Bræðratungu fær Snæfríðar.  Hvernig tengist þetta ævistarfi Arnasar og því hlutskipti sem hann hefur valið sér í lífinu?)

5. kafli:   Athugaðu samtal Arnasar og etatsráðsins.  Hvernig bregst Arnas við Íslandslýsingu hin síðarnefnda?  Hafa samskonar viðbrögð sést annars staðar í bókinni (hjá einhverri annarri persónu)?
Athugaðu sérstaklega orð etatsráðsins um notagildi/gagnsemi Íslands og orð Úffelens.  Lýsa orð þeirra almennri skoðun útlendinga á þessum tíma, að þínu mati?  Taktu einnig eftir orðum etatsráðsins um danska kaupmenn.  Hefur svipuð orðræða komið áður fram í sögunni?

6. kafli:  Hvaða kona er það sem kemur  til fundar við Beyer amtmann?  Hvað vill hún honum?  Skrifaðu nokkrar línur um hvernig lýsingar á húsakosti á Þingvöllum tengjast lýsingum á versnandi kjörum/vaxandi eymd Íslendinga.

7. kafli:  Hvers vegna er Jón Hreggviðsson hættur að kveða Pontusrímur?

8. kafli:  Skoðað breytinguna sem verður á málfari/orðalagi Jóns Hreggviðssonar.  Í hverju er þessi breyting fólgin og hvers vegna skiptir hann um talsmáta/málsnið?

10. kafli:  Athugaðu muninn á Gullinló (sem er höfuðsmaður Íslands) og Snæfríði (sem er að sumu leyti tákn Íslands).  Skoðaðu sérstaklega klæðnað (útgang), útlit, áhugamál og menntun, eftir því sem í hana verður ráðið.  Ræða Snæfríðar er með þekktustu atriðum í bókinni.  Til hvers/hvaða atburða vitnar Snæfríður? Eru einhverjar aðrar persónur í sögunni sem tala á sömu leið, í varnarskyni eða öðru skyni?  Berðu saman orð Gullinlós og orð etatsráðsins, í 5. kafla.  Skoðaðu lokaorð Snæfríðar í þessum kafla.  Hvers vegna hefur skoðun hennar breyst?

11. kafli:  Hvers vegna eignar Jón Hreggviðsson Snæfríði svo margt í ræðu sinni?

12.  kafli:  Taktu eftir framtíðarsýn Snæfríðar og Arnasar.  Hvers vegna rætist hún ekki?   Hafðu þessa lýsingu í huga og berðu saman við örlög þeirra tveggja sem verða.

13. kafli:  Ræða Arnasar í þessum kafla er mjög fræg.  Hvert er aðalatriðið í henni?

18. kafli:  Skoðaðu lýsinguna á biskupshjónunum í lok kaflans.  Hvaða ályktun má draga af litalýsingum?

Gert í apríl 2010
Harpa Hreinsdóttir