VERKEFNI ÚR EINSTÖKUM KÖFLUM

[Sjálfstætt fólk] [Halldór Laxness] [Kennsluvefir Hörpu Hreinsdóttur] Blaðsíðutal á við 6. útg. frá 1996.

25. kafli „Vetrarmorgunn“
Athugaðu upphaf kaflans - hvað er sérstakt við stílinn? (Athugaðu andstæður, endurtekningar, þrítekningar, stuðlasetningu o.s.fr.)
Reyndu að setja þig í spor Nonna litla. Hvað er hann gamall? Hverjar eru „helstu nautnir þessa heims“, skv. draumum Nonna litla? Kannast þú við eitthvað í þessum kafla úr eigin bernsku?
Athugaðu vísurnar á bls. 162. Eru þær til í raunveruleikanum?
Hvaða veikindi hrjá móður Nonna?
 

26. kafli  „Dagur“
Athugaðu mataræði fólksins sem lýst er í upphafi kaflans. Finnst þér eitthvað skorta þar á?
Af hverju vill hreppstjórinn endilega hjálpa fólkinu í Sumarhúsum?

27. kafli „Kvöld“
Athugaðu bls. 191: „... iss, hún er bara manneskja að hálfu leyti, það vantar á hana hitt og þetta ...“ Hvað vantar á Ástu Sóllilju?

28. kafli „Bókmenntir“
Hvernig finnst þér námsefnið sem Ásta Sóllilja lærir? Af hverju vill Bjartur sjá sjálfur um menntun hennar? Finnst þér eitthvað sérstakt vanta í menntun Ástu Sóllilju?

31. kafli „Um saung“
Um hvað fjalla sögurnar sem Finna segir Nonna litla? Berðu þær saman við sögur og kvæði ömmu hans Nonna. Hvernig er Bjartur vanur að dreifa huganum?

32. kafli „Um heiminn“
Gerðu lista yfir klæðnað Ástu Sóllilju eða teiknaðu mynd af henni í sparifötunum :) Er hún fín?
Reyndu að setja þig í spor Ástu Sóllilju í kaupstaðnum. T.d. geturðu skrifað eina blaðsíðu þar sem þú lýsir kaupstaðarferðinni, eins og þú værir Ásta Sóllilja.
Athugaðu bls. 233 - 234: Hvað gerist? Hvernig skilur Bjartur þennan atburð? En Ásta Sóllilja?

33. kafli „Kúgun mannanna“
Berðu saman líðan barnanna, eins og henni er lýst á síðu 241, og líðan Rósu, í kaflanum „Þurrki“, bls. 54. Hvað er líkt og hvað ólíkt í þessum lýsingum?

34. - 35. kafli „Stórviðburðir“, „Gesturinn“
Hvaða þýðingu hefur veiðimaðurinn fyrir hugmyndir og þrár barnanna? Hver getur verið skýringin á því að að aðkomumenn veiða nýmeti á jörð Bjarts, en fjölskyldan þjáist af skorti?
„Um nóttina dreymdi Ástu Sóllilju aftur og aftur að eplisbitinn hrykki uppúr hálsi hennar“ (bls. 251); Hvernig má skýra þennan draum Ástu Sóllilju? (Sjá einnig bls. 240 og 227.)

36. kafli „Bygging“
Taktu eftir því sem Bjartur segir um byggingarframkvæmdir sínar hér og annars staðar. Hvað segja orð hans og framkvæmdir okkur um langtímamarkmið hans?

37. kafli „Eitt smáblóm“
Hvernig getur staðið á blóðmörkuðu kindinni? Taktu eftir fíflinum sem stingur fram kolli um páska. Hvaða hugrenningartengsl kalla orðin "eitt eilífðar smáblóm" á hjá íslenskum lesanda?

38. - 39. kafli „Stríðið“, „Dauði á vorin“
Þessir kaflar segja frá atvikum sem alltaf gátu komið fyrir í búskap heiðarbóndans. Er Bjarti ljúft að farga kúnni? Getur hann að einhverju leyti kennt sjálfum sér um hvernig fór (sbr. 37. kafla)?
 
 
 
 

Síðast breytt í mars 2010.
Harpa Hreinsdóttir