Inngangur

Þessi ritsmíð er hugmyndagrundvöllur að handriti fyrir efni um Egils sögu á margmiðlunarformi.  Henni fylgir sýnishorn af slíku margmiðlunarefni á geisladiski.  (Opna skal geisladiskinn í sæmilega nýrri útgáfu af vefsjá og fyrsta síðan heitir adalsida.htm.)

Undanfarin ár hefur það verið opinber stefna íslenskra stjórnvalda að stuðla sem mest að notkun upplýsingatækni á Íslandi, einkum í skólum.  Í riti Menntamálaráðuneytisins, Í krafti upplýsinga, þar sem stefna ráðuneytisins í upplýsingatækni kemur fram, segir m.a.:

Aukin verði útgáfa á frumsömdum íslenskum kennsluhugbúnaði og fræðsluefni á geisladiskum.
Á boðstólum verði mikið og gott úrval af kennsluhugbúnaði og tölvutengdu námsefni í ýmsum námsgreinum.

Því miður hefur þetta ekki gengið eftir enn og er fátt um fína drætti í tölvutengdu námsefni í íslensku við framhaldsskóla.  Þessi tilraun mín til að gera margmiðlunarefni um Egils sögu er liður í að bæta úr skorti á tölvutengdu námsefni og auka fjölbreytni efnis um Íslendingasögurnar.  Ég geri ráð fyrir að efnið liggi frammi á vefnum, þótt sýnishorn þess fylgi ritgerðinni á geisladisk, en ég mun vinna talsvert að gerð þess nú í sumar.  Líklega verður fyrsta útgáfa efnisins tilbúin í septemberbyrjun í haust.

Fátt hefur verið skrifað um texta á tölvutæku formi á íslensku.  Þess vegna byrja ég á að fjalla um helstu einkenni þess konar texta, í 1. kafla ritgerðarinnar.  Í öðrum kafla fjalla ég um kenningar um munnlega geymd og það sem munnleg frásagnarhefð á sameiginlegt með vefnum.  Í þriðja kafla geri ég síðan grein fyrir hugmyndum mínum um hvernig koma megi efni um Egils sögu, sem nýtist fyrst og fremst framhaldsskólanemendum, á margmiðlunarform.  Að lokum eru svo stutt lokaorð.