Verkefni úr einstökum köflum
 

[Sjálfstætt fólk] [Halldór Laxness] [Kennsluvefir Hörpu Hreinsdóttur] Blaðsíðutal á við 6. útg. frá 1996.

Ath. Þessi verkefni er ágætt að vinna jafnóðum og sagan er lesin og koma sér þannig upp vinnubók. Það gæti nýst vel í upplestri undir próf.

 1. kafli „Kólumkilli“
Taktu vel eftir þessari þjóðsögu sem sagan hefst á. Reyndu að læra helstu atriði hennar, svo þú getir sagt hana nokkurn veginn skammlaust.

 2. kafli „Jörðin“
Teiknaðu mynd/kort sem sýnir staðhætti, eftir því sem þeim er lýst í sögunni.
Hvers vegna vill Bjartur skipta um nafn á bænum?

3. kafli „Brúðkaup“
Ímyndaðu þér að þú hafir verið gestur í brúðkaupi þeirra Bjarts og Rósu. Segðu vini þínum (t.d. sessunaut) frá brúðkaupinu og reyndu að segja frá ræðu skáldkonunnar á Útirauðsmýri, eftir minni.

4.- 5. kafli „Skýjabrok“ og „Leyndarmál“
Hvernig er Rósu innanbrjósts, þegar hún kemur fyrst í Sumarhús?
„O, ætli sumir hafi ekki komið eins nálægt sumum einsog þeir kærðu sig um? Best gæti ég trúað því“ (bls. 39). Útskýrðu hvað Bjartur á við með þessum orðum.
„Svona var þeirra hjónaband“ (bls. 41). Hvernig var það? Svaraðu í 30- 50 orðum.

7. kafli „Hjartveikin“
Athugaðu mataræði Rósu og Bjarts. Hvað vantar Rósu?
Hvernig lýsa veikindi Rósu sér? Hvað er að henni?

9. kafli „Skógarför“
Hvers vegna reynir Rósa að fela sig fyrir gestunum? Hvert er álit Bjarts á þessum gestum? Hvernig kemur matarsmekkur Bjarts fram í þessum kafla?

13. kafli „Skáldkonan“ Hvert virðist vera viðhorf Rósu til skáldkonunnar?
Að hverju er ýjað í lok 13. kaflans?

18. kafli „Útirauðsmýri“
Um hvað snýst samtal Bjarts og maddömunnar í rauninni? Athugaðu sérstaklega bls. 122 í þessu sambandi; Hvað er Bjartur að hugsa og hvernig skilur maddaman orð hans?

19. kafli „Lífið“
Hvers vegna finnst Bjarti að hann hefði "sjaldan verið jafnósjálfstæður í hjarta og þetta kvöld" (bls. 124)?

20. kafli „Erindagerðir“
„...um dauða Rósu spunnust dulrænar sögur, ... og lék ekki á tveim túngum hver væri orsökin ...“ (bls. 126). Af hverju mynduðust slíkar sögur um dauða Rósu? - Semdu eina svona dulræna kjaftasögu og vertu tilbúin(n) að segja einhverjum félaga þínum hana!
Skrifaðu örstutta lýsingu á prestinum, eins og þér kemur hann fyrir sjónir.

21. kafli „Líkmenn“
Skrifaðu lýsingu í örstuttu máli um sérhvern líkmannanna (sjá einnig 10. kafla) - eitthvað á þessa leið: Einar í Undirhlíð: „nútímaskáld“, fátækur, skuldugur við hreppstjórann og Finsen (lækni?), píndur til að kjósa „rétt“.
Ólafur í Ystadal:
Þórður í Niðurkotinu:
Fjallkóngurinn:

24. kafli „Frostsins eldur“
„Það sem hundurinn leitar að, finnur hann hjá manninum.“ „Það sem maðurinn leitar að, finnur hann í glyrnum hundsins“ (bls. 152). - Ræðið þessar fullyrðingar. Hvað er átt við? Eruð þið sammála þessu?

 Hvaða þýðingu hefur hin einkennilega þula gömlu konunnar í lok kaflans? Af hverju fer sú gamla með hana?