Egill fæddist í Breiðholtinu, í bílskúrnum heima hjá sér. Foreldrar hans voru mjög efnaðir og var hann ofdekraður. Egill var mjög ljótur en hann átti bróður er Þórólfur hét. Þórólfur var nokkrum árum eldri og æðislega sætur.
Þegar Egill var þriggja ára stalst hann í vínskáp pabba síns og tæmdi flöskurnar af heimabruggaða eplasnafsinum. Egill var erfiður krakki. Hann var óstýrilátur mjög og frekur. Þegar hann var 7 ára bannaði pabbi Egils honum að fara á barinn. Var Egill ósáttur við það, sótti sér kjöthnífinn og rak viðskiptavin pabba síns í gegn þar sem hann var í heimsókn hjá þeim. Hleypur Egill síðan út og rekst á hóp af Hells Angels mótorhjólatöffurum. Taka þeir hann fagnandi í hópinn og fer Egill rænandi, ruplandi og drepandi með þeim um öll Norðurlönd og Rússland.
Þegar Egill var fimmtán ára hitti hann svo höfuðpaurinn í genginu sem gekk undir nafninu Eiríkur blóðöx. Varð þeim illa hvorum við annan við fyrstu sýn. Deildu þeir nokkuð en það var aðallega kellingunni hans Eiríks sem var illa við Egil, en hún hafði verið á kafi í svartagaldri. En það stoppaði ekki Egil sem hélt áfram að ræna og drepa.
Egill var drykkfelldur mjög og gefinn fyrir alls konar önnur efni.
Þegar Egill var kominn á þrítugsaldurinn giftist hann sinni heittelskuðu Ásgerði sem var nýbúin að skilja við Þórólf, bróður Egils. Um þetta leyti var Eiríkur orðinn mjög þreyttur á yfirganginum í Agli og rak hann úr klúbbnum. Egill lét segjast en sór að hann skyldi hefna sín. Hann fór svo og stofnaði annað gengi sem hann kallaði Bandidos. Hélt Egill uppteknum hætti með nýja genginu.
Einn daginn hitta þeir Hells Angels klíkuna í bæ einum sem þeir voru að ræna. Kom þá að uppgjöri. Hófst mikill byssubardagi. Gengur Egill þá berserkgang og plaffar alla niður. En þá sá Egill að Eiríkur var á hlaupum í burtu. Egill hleypur eftir honum en kemst þá að því að hann var skotfæralaus. Hoppar Egill þá á Eirík og bítur hann á barkann svo Eiríkur lét þar lífið.
Egill sér að honum verði ekkert meira ágengt í þessum löndum svo hann flyst til Kólumbíu og gerist eiturlyfjabarón. Þar endar hann ævi sína í hárri elli.
